Yangiliklar

O‘zbekiston Respublikasi Prezidentining “Toshkent axborot texnologiyalari universitetining faoliyatini yanada takomillashtirish chora-tadbirlari to‘g‘risida”gi qarori imzolandi

 

Joriy yilning 15 mart kuni O‘zbekiston Respublikasi Prezidenti “Toshkent axborot texnologiyalari universitetining faoliyatini yanada takomillashtirish chora-tadbirlari to‘g‘risida”gi 2834-sonli qarorni imzoladi. Qaror asosida Toshkent axborot texnologiyalari universitetiga atoqli ajdodimiz? Matematik va olim Muhammad al-Xorazmiy nomi berildi.

Qaror ulug‘ alloma Muhammad al-Xorazmiyning buyuk va bebaho merosini qadrlash, asrab-avaylashning naqadar muhimligini yosh avlod ongiga chuqur singdirish, shuningdek, yoshlarga ta’lim-tarbiya berish va ilm-fanning yuksak marralarini zabt etish uchun shart-sharoitlar yaratish hamda respublika iqtisodiyotining yetakchi tarmoqlari va sohalari uchun axborot-kommunikatsiya texnologiyalari sohasida yuqori malakali mutaxassislar tayyorlash tizimini yanada takomillashtirishga xizmat qiladi.

Hujjatda iqtisodiyotning yetakchi tarmoqlari va sohalarida ta’lim, ilm-fan va ishlab chiqarishning mustahkam aloqalarini ta’minlash uchun axborot-kommunikatsiya texnologiyalari sohasida respublika va xalqaro ko‘lamda ilmiy-amaliy anjumanlar tashkil etish, oliy ta’lim muassasalari talabalari o‘rtasida axborot-kommunikatsiya texnologiyalari sohasida, shu jumladan, dasturiy mahsulotlarni yaratish borasida tanlov va olimpiadalar o‘tkazish, universitetning iqtidorli talabalari uchun beriladigan Muhammad al-Xorazmiy nomidagi stipendiyani joriy etish kabi muhim vazifalar belgilab berilgan.

Shuningdek, 2018-yilda Muhammad al-Xorazmiy tavalludining 1235-yilligini keng nishonlash yuzasidan ilmiy-amaliy va ma’naviy-ma’rifiy tadbirlarni amalga oshiriladi. Shu bilan birga, universitetda “Muhammad al-Xorazmiy avlodlari” nomli ilmiy jurnal nashr etilishi belgilab berilgan.

Qaror asosida amalga oshirish belgilangan yana bir muhim voqea universitet huzuridagi Dasturiy mahsulotlar va apparat dasturiy majmualar yaratish markazi negizida yuridik shaxs maqomiga ega bo‘lgan Axborot-kommunikatsiya texnologiyalari ilmiy-innovatsion markazi tashkil qilinishi bo’ldi. Ushbu markaz oldiga respublika iqtisodiyotining yetakchi tarmoqlari va sohalari uchun real ehtiyojlarni hisobga olib, ichki va tashqi bozorlarda raqobatbardosh, sifatli mahalliy dasturiy mahsulotlarni, eng avvalo, Universitetda ta’lim olayotgan talabalarni keng jalb etgan holda ishlab chiqish, axborot-kommunikatsiya texnologiyalari sohasida ilmiy maktablarni yanada rivojlantirish, yosh olimlar va ilmiy-pedagog xodimlar mehnatini rag‘batlantirish, ularning ilmiy-tadqiqot hamda tajriba-konstruktorlik ishlarini tijoratlashtirishni tashkil qilish kabi muhim vazifalar qo’yilgan.

Prezident qaroriga binoan, universitetning iqtidorli talabalari, professor-o‘qituvchilari va yosh ilmiy xodimlarini yetakchi xorijiy oliy ta’lim muassasalari hamda ilmiy-tadqiqot markazlarida tayyorlash, qayta tayyorlash va malakasini oshirish, shuningdek, Universitetda dars berish va Markazda ilmiy tadqiqotlar o‘tkazish uchun yuqori malakali xorijiy mutaxassislar va olimlarni jalb qilish amaliyoti yo’lga qo’yiladi.

Aytish joizki, Prezidentimizning ushbu qarori mamlakatimizda axborot-kommunikatsiya texnologiyalari sohasi uchun kadrlar tayyorlash, yurtimizda axborot texnologiyalari sohasini rivojlantirishda navbatdagi muhim qadam bo’ldi. Qaror matni bilan batafsil O’zbekiston Milliy axborot agentligi saytida tanishish mumkin.